何謂散戶炒股

近日無論身在何處，總會聽到一大班散戶高談闊論炒股心得，全民皆股的情況勁過九七金融風暴，科網股爆破前夕。但最令小弟不安的是大家似乎都忘記了身家被一夜蒸發的經驗，買賣股票全用耳仔去聽，只聽number, 所有基本因素都不理，以下有兩個案例，相信都能體會到情況究竟有幾利害。

案例一：阿八嬸昨日興致勃勃走去同四嬸講，「隻1800個價近幾日已經回好多，係時候買番少少喇！」四嬸即時有反應，「我今朝已經買啦！我覺得呢隻股票一定得，話晒係『銀行股』絕對穩陣，依家仲話搞緊乜QDII，絕對係有買貴冇買錯。」阿八嬸仲話，「我都有同感，話晒係中行、交行同建行混合體，聽個名就知道係堅料，隨時過兩年仲勁過隻HSBC同渣打。」

案例二：「聽到經紀陳話隻黃金集團短期會翻一番。」文少正與女朋友研究投資策略。女朋友問，「黃金集團究竟做乜業務，點解可以短期內升一倍？」文少答，「我已研究過近日金價，應該仲有得上，既然金價仲升，黃金集團點會唔升，中石油搵到個油礦都勁升啦！」

查實中交建是內地基建股，黃金集團做賭業，小弟雖然並非股票專家，但上述案例確實得人驚，香港同大陸股民一樣瘋狂。